Ксюша, Саша да Дарина – куим нывъёрт. Талун библиотекаын найö тöдмасисны Зоя бабкöд – челядьлы коми гижысь Зоя Ивановна Роговакöд да сылöн творчествоöн. Найö окотапырысь лыддисны гижысь йылысь, сылысь кывбуръяс да висьтъяс.
Тöдмалicны челядь, мый чужис Зоя Ивановна Пальсянь неылын – Придаш сиктын, гӧль кресьтянин семьяын. Шӧр школа помалӧм бӧрын велӧдчис Сыктывкарса педучилишшеын. Уджаліс пионервожатӧйӧн, вӧлі велӧдысьӧн Придаш, Ипать да Мандач школаясын, библиотекараліс да веськӧдліс клубӧн. Война кадся уджысь сылы вӧлі сетӧма «1941-1945 воясся Айму вӧсна Ыджыд тыш дырйи бур уджысь» медаль.
Кывбуръяс, висьтъяс гижöм кындзи Зоя Рогова радейтлiс серпасасьны. Тӧдic коми фольклорысь уна важ сьыланкыв, нӧдкыв, частушка, кодъясӧс пыртлiс аслас гижӧдъясö.
Волic Зоя Рогова и Паль сиктӧ, аддзысьлiс лыддьысьысьяскöд. Пальсаяс весиг пуктiсны-петкӧдлісны гижысьлöн «Кывзысьтöм нывкаяс» пьесаысь неыджыд юкöн. А кор сетicны кыв Зоя Роговалы, биыс друг кусiс. Но Зоя Ивановна эз шöйöвош: паметь серти лыддис ассьыс кывбуръяссö, сьылiс, кытчöдз бисö эз сетны.
Дона лыддьысьысьяс! Ставныд пырöдчöй «Челядь лыддьöны Зоя Роговаöс» акцияö, кодöс сиöма гижысьлöн чужöмсянь 100 во тыригкежлö.
